گورنر اسٹیٹ بینک کو 1000 قرض نادہندگان کی فہرست عام کرنے کی ہدایت
![](https://urdu.thereporters.pk/wp-content/uploads/2024/07/State-bank-of-Pakistan.jpg)
پاکستان انفارمیشن کمیشن نے گورنر اسٹیٹ بینک کو 1000 قرض نادہندگان کی فہرست عام کرنے کی ہدایت کردی
پاکستان انفارمیشن کمیشن نے کراچی کے رہائشی عظمت خان کی جانب سے دائر معلوماتی درخواست کے جواب میں اسٹیٹ بینک آف پاکستان (ایس بی پی) کے گورنر کو 1000 بڑے قرض نادہندگان کی فہرست جاری کرنے کی ہدایت جاری کی ہے۔پاکستان انفارمیشن کمیشن کی جانب سے جاری اعلامیہ کے مطابق عظمت خان نے معلومات تک رسائی کے حق ایکٹ، 2017 کے تحت فہرست طلب کی تھی۔ جواب میں، اسٹیٹ بینک آف پاکستان نے ایکٹ کے سیکشن 7(d) کے تحت معلومات کو ظاہر کرنے سے استثنیٰ کی درخواست کی، جو کہ بینکنگ کمپنیوں کے ریکارڈ سے متعلق ہے
کمیشن نے معلومات کی درخواست، اسٹیٹ بینک کی جانب سے تحریری جواب اور متعلقہ قانون کا بغور جائزہ لیا۔ کمیشن کے حکم میں واضح کیا گیا کہ معلومات تک رسائی کے حق ایکٹ 2017 کی دفعہ 7(d)، جو کچھ ریکارڈز کو افشاء سے مستثنیٰ قرار دیتا ہے، قرض نادہندگان کی درخواست کردہ فہرست پر لاگو نہیں ہوتا ہے۔
کمیشن نے کہا، "یہ ایک تسلیم شدہ حقیقت ہے کہ 1000 افراد نے متعلقہ بینکوں سے قرضے حاصل کیے اور انہیں واپس کرنے میں ناکام رہے، جس سے ملک اور اس میں شامل بینکوں دونوں کو کافی مالی نقصان پہنچا۔ ایسے افراد کو انکشاف سے محفوظ نہیں رکھا جا سکتا،”
کمیشن نے مشاہدہ کیا کہ اسٹیٹ بینک کی جانب سے دی گئی استثنیٰ کا اس کیس سے کوئی تعلق نہیں ہے۔ نتیجتاً پبلک باڈی کی درخواست کو مسترد کر دیا گیا ہے۔ اسٹیٹ بینک کے گورنر کو ہدایت کی گئی ہے کہ وہ مطلوبہ معلومات افشا کرکے 10 دن کے اندر کمیشن کو پیش کریں۔ عمل نہ کرنے کی صورت میں معلومات تک رسائی کے حق ایکٹ 2017 کے سیکشن 20(f) کے تحت ذمہ دار فریقین کے خلاف کارروائی شروع کی جائے گی۔